Este material formou parte do curso "Introdución práctica ao flipped learning: bases do modelo, deseño da aprendizaxe e ferramentas para implementalo" que impartín online durante varias edicións para a Universidade de Vigo. Debido ao peche da miña universidade e ao cese da actividade lectiva presencial en marzo de 2020 pola pandemia do COVID-19, pareceume oportuno pór este material a disposición dunha comunidade que –nalgúns casos– se enfronta por primeira vez á docencia en liña. É obvio que o material que aquí deposito non se corresponde netamente con esa necesidade, pero creo que as ideas sobre deseño ou ferramentas poden ser de utilidade se non chegamos a ter acceso a recursos formativos mellor optimizados nun prazo breve de tempo.